https://www.youtube.com/watch?v=apUuy3g1RCE&feature=youtu.be
羅生話5個要入場睇賀歲盃嘅理由，我多佢1個：
第一個理由：「二零一九 佢又出手」
羅生又擔起賀歲盃支大旗，請外隊來賀歲。當大家聞到味，好似又會係港隊＋港聯賀歲時，佢又忍唔住出手嘞！
搞返兩日4隊波，最初打算係飛馬同3隊外隊，最後決定係港聯一齊玩好啲。三對外隊，中國代表係中超季軍山東魯能，日本代表係簽咗費度托里斯既鳥棲砂岩，仲有一心嚟(隔年)衛冕嘅紐西蘭既奧克蘭城FC，戲碼算幾好。
第二：「超抵套票起標價 唔係唔入場吖嘛」
套票$480 / $280 / $180（學生長者）。假設你買$280，會去Red Mr或adidas用埋票尾$100，而你4:00入場，8:00離場，兩日享受8個鐘娛樂，每個鐘平均價係$22.5，平過的士起標！
第三：「羅生出親手，梗有啲諗頭」
將成個賀歲杯詳情唱出嚟，首次有主題曲，仲拍賣MV嘅賀歲杯宣傳。係MV見到大球場紅海，即刻好熱血！香港人點會唔知道，每年初一、初四大球場有賀歲盃呀？而今年改咗初一初三，千祈唔好記錯。
第四：「球場DJ打碟 入場又叫又跳」
請咗DJ Carta及Yako喺中場現場打碟，放心唔係平時球賽中間播歌咁簡單，音響絶對會係演唱會級數。
第五：「阿里巴巴助拳 網售國內門券」
請得中國球隊，銷售對象唔少得國內球迷，為海外售票打開方便之門，今次有阿里爸爸旗下「大麥網」加入賣飛，有望會賀歲盃場面更加熱鬧。
第六：「引入電子廣告板 有雞先至有雞蛋」
呢個關我事。當（差不多）全世界都用電子廣告板，我哋因為球場屬於康文署，而場地設施唔提供電子廣告板，主辦單位如果想用，就要自行租用，朝行晚拆，成本好高，仲要克服好多技術問題。
呢個係雞同雞蛋嘅題目：因為冇乜人落廣告所以用唔起電子版，因為球場廣告仲係用木板所以冇乜人落廣告。我終於斟妥LED電子廣告板贊助喇，雖然因爲咁多咗好多嘢做，但我會努力再努力。
搞一場波，好多心血，希望大家力撐。
球迷想入場撐，門票明天（1月18日）在Cityline發售。
客戶想斟洽贊助，可以搵我，因為多咗電子廣告板，好多package可以揀。
索取贊助套餐資料：info@themaxihouse.com
我而家收工嘞，明天繼續做。
Search